LAOAG CITY – Arigna napukaw aminen ti karbengan dagiti babbai idiay Afghanistan gapu iti baro nga inpatungpal a linteg ti Taliban.
Naipalaon iti baro a linteg a maipawil a mangngegan iti publiko ti boses dagiti babbai idiay Afghanistan.
Naipatungpal a dagus ti baro paglintegan kalpasan nga inaprubaran ni supreme leader Hibatullah Akhundzada isut gapuna a saanen a mabalin nga agkanta, agbasa ken ag-recite dagiti babbai iti publiko.
Maipalagip nga immunan a napawilan dagiti babbai iti nadakamat a pagilian nga agsuot kadagiti kawes nga adda ti makita uray bassit laeng a paset ti bagida.
Naiget ti mandato kadagiti babbai iti Afghanistan a no rumuar da ket masapol a ti laeng mata da ti makita ken ti arwaten da ket saan a nailet, nakiting ken naingpis.
Malaksid iti daytoy, mabalin laeng a rumuar dagiti babbai no adda ti kadwa da a lalaki a mangbayabay kadakuada.
