LAOAG CITY – Inpakaammo ni Mrs. Eva Madriaga Burrow, iti Farmington, Missouri, USA, tubo iti ili ti Currimao, a saan da pay a nagbotos babaen kadagiti naipatulod kadakuada a balota para iti kinapresidente a pagbalubalan da US President Donald Trump kenni Democratic candidate Joe Biden.
Daytoy ket gapu iti panagamak dagiti sumagmamano a botante a maswitik ti botos no agbotos da kadagiti naipatulod a balota.
Segun kenni Mrs. Burrow, nagdesisyon ti asawa na nga agbotos laengen iti kaaldawan ti eleksiyon intono Nobyembre 3 ita a tawen gapu iti panagamak na a maswitik ti botos na.
Inlawlawag na nga adda ti posibilidad na a maswitik ti botos babaen kadagiti naisumitir a balota.
Iti panangtantsa ni Mrs. Burrow, possible a ti mangaramid ti maipagarup a panagswitik iti botos ket iti biang ti Democrat.
Nupay kasta, adun dagiti nakapagbotos a residente iti estado ti Missouri ken agdagupen iti 40 a milyon dagiti nakapagbotos iti intero nga Amerika.
Kabayatanna, naglaok ti pannirigan dagiti residente ken Pilipino a nagbalinen nga American Citizen iti kalikagum ni Democratic candidate Joe Biden seknan ti tax plan kasta met iti Immigration Policy ni Presidente Donald Trump.
Kuna ni Mrs. Burrow, a ngimmato ti mabayadan kadagiti mapetisyonan a kabagyan dagiti Pilipino nga agnaed iti Estados Unidos.
Daytoy ket gapu ta adu dagiti illegal immigrant a sumsumrek iti Estados Unidos manipud iti nagduduma a pagilian.
Inbatad na a ti tax plan ni Biden ket adu met dagiti mangayat kenkuana ngem adu met dagiti saan a mangayat ti kalikagum na a maingato ti GOP’s tax cuts.
Segun kenni Mrs. Burrow, panunuten na kuma met dagiti agsusueldo iti nababbaba ngem 400 a ribo a dolyar seknan iti baybaydan da a buwis.
Nupay kasta, pabor da kenni Presidente Trump iti mapaspasangasangan nga eleksiyon iti nasao a pagilian.
Idi 2016 US Presidential Election, nangabak ni Presidente Trump iti Missouri babaen iti 56.4% a botos idinto a 37.9% laeng ti nagun-od a botos ni Hillary Clinton.
