LAOAG CITY – Nairekomendar ti pannakaiyimplementar ti “Botika sa Barangay” tapno maliklikan ti pannakailako ti peke nga agas.
Trinatar ti Sangguniang Panlalawigan ti ordinansa a mangipawil ti panaglako ti agas dagiti Sari-Sari Store ditoy Ilocos Norte.
Daytoy ket kalpasan nga immapela ti Sangguniang Panlalawigan iti Food and Drug Administration wenno FDA kabayatan ti pannakaisayangkat ti panagdingngeg ti Committee on Health and Sanitation.
Maysa kadagiti kiniddaw ti junta probinsyal ket ti pannakapalukay ti pammilin babaen ti Department of the Interior and Local Government wenno DILG ken Food and Drug Administration tapno saan a marigatan dagiti amin a sari-sari stores ditoy Ilocos Norte laketdi maipasigurado ti saan a panagwaras dagiti peke nga agas ditoy probinsia.
Basar ti panangamiris dagiti agpanpanday linteg ti probinsia, nayun a padagsen para kadagiti sari-sari stores owners no mapaigetan ti implementasion ti nasao nga ordinansa gapu ta masapolda a mangala ti permit ken agbayad pay ti lisensiado a pharmacist no aglakoda ti agas uray pay dagiti Over the Counter Drugs wenno agas kas panangliklik ti panagraira ti peke nga agas.
Nupay kasta, nagbalin a natangken ti takder ti biang ti Food and Drug Administration ti nasao a banag ken nasken a masurot latta no ania ti nakaipalaon ti paglintegan pakairamanan ti pammilin ti biang ti Department of the Interior and Local Government.
