LAOAG CITY – Nalatak ti Fillico Jewelry Water, maysa a Japanese brand, kas maysa kadagiti aglaklako ti kanginaan a danom iti intero a lubong. Dagiti limitado nga edision ti produktoda ket agbalor ti P500,000 iti kada bote.
Ti danom nga us-usaren ti Fillico ket aggapu iti Nunobiki Spring iti Rokkou National Park iti Kobe, maysa a lugar nga adayo iti aniaman a polusion.
Dinayaw ti kalidad ti danom daytoy gapu iti natural a panag-filter ti volcanic rock. Iti baet daytoy, saan laeng ti danom mismo ti mangipangpangato ti kantidad ti produkto.
Naammoan a ti kangrunaan a rason no apay a nangina ti presio daytoy ket ti disenio ti bote. Ti kada bote ti Fillico ket dinisenio kas maysa a work of art. Adda dagiti dekorasion daytoy ti Swarovski crystals ken balitok.
Limitado pay ti produksion daytoy iti 5,000 a bote iti kada bulan tapno mapagtalinaed nga exclusive.
