LAOAG CITY – Naan-anayen a limmawag ken nawaknitan iti aglawlaw ti Laoag City Public Market and Commercial Complex ken naannayasen ti taray dagiti lugan iti paset ti tiendaan ditoy ciudad ti Laoag.
Daytoy ti inbatad ni Ms. Eva Marie Dumlao, Licensing Officer III iti Business Permit and Licensing Office ditoy ciudad ti Laoag.
Inpakaammo na nga awanen dagiti makita a sidewalk vendors nga aglaklako iti lawlawa ti tiendaan.
Nupay kasta, inpasingked na nga agtultuloy ti panagmonitor da aglalo iti Rizal St., Bonifacio St. ken Abadilla St.
Innayon na a katulungan da dagiti kameng ti Philippine National Police, City Disaster Risk Reduction and Management Council ken dagiti inspector iti nasao nga opisina nga agmonitor kontra kadagiti aglako paylaeng iti lawlaw ti tiendaan.
Mainaig iti daytoy, nagballaag ni Dumlao a no adda dagiti maduktalan da paylaeng nga aglako iti lawlaw ti tiendaan ket saan da nga agpangadua a mangipataw ti multa kadakuada.
Maipalagip nga immunan nga inrakurak ti Business Permit and Licensing Office a nabilin dagiti sidewalk vendors a temporaryo a mapan da paylaeng agpwesto iti uneg ti merkado publiko agingga nga awan ti umiso a pagpwestoan da.
