LAOAG CITY – Kinumpirmaran ni Mr. Philip Raymund Salem, Branch Head ti PAGIBIG – Ilocos Norte a naan-anay a maipatungpal ti pannakaipangato ti saving rate ti PAGIBIG fund a mangrugi inton Pebrero 1 ita a tawen.
Segun kenkuana, idi pay laeng 1986 ti naudi a nagpangato ti saving rate ti PAGIBIG fund no sadino umabot iti 100 a pisos ti personal share ken 100 a pisos para iti employer’s share.
Inbatadna no idasig ti consumer price index idi 1986 ken iti agdama a tawen ket ti 100 a pisos idi 1986 ket kaibatugan itan ti P866.50.
Inlawlawagna a ti kinapudnona ket naitantan ti pannakaipatungpal ti panagngato ti saving rate ti PAGIBIG fund idi tawen 2021, 2022 ken 2023 isu a masapol nga ita a tawen 2024 ket maipatungpalen daytoy.
Gapu iti daytoy, kuna ni Mr. Salem a ti dati a 100 a pisos ket mapagbalinen a 200 a pisos ti personal share iti PAGIBIG kasta met ti employer’s share ket manipod iti 100 a pisos ket agbalinen a 200 a pisos ti monthly savings.
Inpalgakna a maiyaplikar laeng daytoy a baro a pagalagadan kadagiti empleado wenno self-employed a makabirbirok ti 10 a ribu a pisos agpangato iti uneg ti kada bulan.
Kunana a babaen iti daytoy ket mas mapatibker ti housing loan program ti PAGIBIG ken tapno saan a ngumato ti interest a bayadan dagiti miembro iti daytoy.
Inbatadna nga iti agdama ket manarimaan ti panagaramidda ti surat a maipatulod kadagiti employers ditoy probinsia tapno maipakaammo daytoy kadakuada.
Innayonna a masapol pay nga iparehistro dagiti amo dagiti kasambahay dagitoy iti nasao a programa.
Kabayatanna, inpakaammo ni Salem a karaman dagiti Overseas Filipino Workers ti baro a pagannurutan ti PAGIBIG.
