LAOAG CITY – Maisayangkat ti Breast Self Examination ken Visual Inspection with Acetic iti Laoag City General Hospital inton Marso 16.
Daytoy ket kas paset ti panangselebrar iti International Women’s Month ditoy siudad ti Laoag.
Segun ken ni Mrs. Janet Retamal, mangidadaulo ti Population on Commission ditoy siudad ti Laoag, magutgutigot dagiti amin a babbai ditoy siudad kangrunaanna kadagiti sexually active a makipaset iti nasao nga aktibidad tapno makita no ania ti estado dagitoy.
Inbatadna a daytoy nga aktibidad ket dakkel a tulong para kadagiti babbai gapu ta dumalanda iti assessment a mang-detect iti cancer cell wenno sexually transmitted infection.
Kunana a napintas daytoy nga aktibidad tapno masaluadan dagiti babbai dagiti bagida maipanggep iti nagduduma a sakit.
Inlawlawagna a no bilang adda dagiti agpositibo ket insigida a mai-refer iti Mariano Marcos Memorial Hospital and Medical Center iti siudad ti Batac para iti naan-anay a pannakataming dagitoy.
Innayonna nga awan ti pagdanaganda gapu ta libre daytoy ngem nairanta laeng para kadagiti babbai a residente ditoy siudad ti Laoag.
