LAOAG CITY – Agproblema ti Brgy. 10 ditoy siudad ti Laoag maipapan iti kidkiddawenda a lote a paset iti National Bureau of Investigation.
Segun ken ni Sangguniang Panlungsod Member Bryan Alcid, kalikagum ti nasao nga ahensia nga awan ti itedda gapu ta ti nadakamat a lote ket isu ti nakaipatakderan ti Cybercrime Building.
Inbatadna a ti nasao a lote ket addaan ti kalawa 1,300 square meters no sadino ti ikidkiddaw laeng ti maseknan a barangay ket 300 square meters.
Inlawlawagna a daytoy koma ti pakaipasdekan ti barangay hall ti Barangay 10 ditoy siudad ti Laoag.
Innayonna a babaen iti tulong ti Congressional Office ket manamnama a masolbar daytoy a parikot dagiti residente ken opisial ti barangay.
Kabayatanna, naammoan nga adda ti maiyuswat a panagtataripnong iti National Bureau of Investigation, dagiti maseknan a barangay officials ti Brgy,. 10 ken ti Local Chief Executive.
Maipalagip a naduktalan ti lokal a gobierno ditoy siudad ti Laoag a saan a kukua ti siudad ti nakaipatakderan ti building iti National Bureau of Investigation no di ket kukua ti gobierno nasional.
