LAOAG CITY – Kinumpirmaran ni Brgy. Chairman David Pascua iti Brgy. 23 iti ili ti San Nicolas nga adda iti sumagmamano a sitio iti nadakamat a barangay ti naapektaran ti African Swine Fever.
Maibasar iti report, lima a sitio ti naaoektaran rason a dagus a nangisayangkat da ti checkpoint ken blood testing iti uneg ti 500-meter radius manipud kadagiti naapektaran a lugar bayat a maur-uray ti resulta dagiti test.
Kunana a maladingitan daytoy gapu ta umabot iti nasurok 200 a baboy ti immununan a nakuriente ken naikali gapu iti nadakamat a virus.
Mainaig iti daytoy, adda dagiti sumagmamano a hog raisers ti nagkedked nga ipadalan iti blood testing dagiti taraken da a baboy.
Nupay kasta, inlawlawag ti biang ti gobierno a nasken a maipadalan dagitoy iti testing tapno alalisto a malappedan ti pannakaiwaras ti African Swine Fever virus.
Iti agdama, agtultuloy ti 24-hour checkpoint operation ti nasao a barangay tapno mangmonitor iti iseserrek ken panangiruar kadagiti live stocks ken tapno maliklikan ti pannakaiwaras ti nadakamat a sakit.
