LAOAG CITY – Nangipatungpal ti Barangay 60-A, Caaoacan ditoy siudad ti Laoag ti force evacuation kadagiti residente gapu iti Super Typhoon Uwan.
Nupay kasta, inbatad ni Barangay Chairman Adel Boy Quinto a saan amin a kabarangayanna ti naallukoy nga agturong iti evacuation center.
Inlawlawagna nga adda laeng ti uppat a pamilia ti nagibakwit iti evacuation center a bukbuklen ti 11 nga indibidual, lima dagiti nataengan ken innem dagiti ubbing.
Kunana a basar iti pannakisarsaritana kadagiti residente a saan nga insigida a simmurot iti force evacuation ket obserbarenda pay laeng ti situasion iti panawen.
Mainaig iti daytoy, basar iti panagturong ti Bombo Radyo Laoag News Team nga adda dagiti sumagmamano a pagtaengan ti nangigalot kadagiti galba ti pagtaenganda ken nangikabil ti sako a naglaon ti darat a nangpandag kadagiti galba dagiti balayda tapno saan a maitayab no adda ti napigsa nga angin a sumangbay.
Kabayatanna, ti Barangay 60-A, Caaoacan ditoy siudad ti Laoag ket karaman kadagiti coastal areas wenno asideg iti baybay isut gapuna a naiget ti pakdaar dagiti otoridad kadagiti maseknan a residente.
