LAOAG CITY – Inpakaammo ni Brgy. Kagawad Daniel Guerrero iti Brgy. 7 iti ili ti Bacarra nga awan ti nadangran kalpasan ti napasamak nga alipogpog iti nasao a barangay.
Nu pay kasta, kuna na a kangrunaan a nadadael dagiti kaykayo ken nadalapos ti linya ti kuryente.
Inbatad na a nu pay ado ti naspak a kaykayo ket awan met ti naapektaran a pagtaengan wenno aniaman a pasdek iti idadalapos ti alipogpog.
Inpakaammo ni Guerrero a daytoy ti umuna a gundaway a nadalapos ti alipogpog iti lugarda.
Immuna iti daytoy, inlawlawag ni Brgy. Kagawad Princess Paeste iti nasao met laeng a barangay a bayat nga agtudtudo ket kellaat a naantisiparanna ti dimmalapos a napigsa nga angin ken adda ti arigna napigsa a panagrisak.