LAOAG CITY – Inbatad ni Barangay Chairman Jojie Calapao iti Barangay Barani iti ciudad ti Batac a natalged ti barangay manipod iti covid-19.
Daytoy ket iti baet nga adda ti maysa nga health worker a residente iti barangay da a nagpositibo ti nasao a virus.
Inlawlawag ni Calapao a maibilang a natalged latta ti barangay da gapu ta sipud idi Hulyo 12 ket saan pay a nagaw-awid ti nasao a pasyente.
Innayon na a ti pamilya ti pasyente ket saan da met nga ugali ti makipulpulapol iti sabali ken manmano laeng a rumuar da iti pagtaengan.
Nupay kasta, inbaga ni Calapao a nangisayangkat da latta ti contact tracing kadagiti possible a nakapulapol ti pamilya.
Malaksid iti daytoy, masapol nga ag-home quarantine latta dagiti miembro ti pamilya ti pasyente iti uneg ti 14 nga aldaw.
Segun ken ni Calapao, ti pasyente ket maysa a nurse iti Mariano Marcos Memorial Hospital and Medical Center iti ciudad ti Batac.
Innayon na a ti nurse ket na-expose iti maysa a covid-19 patient iti kallabes.
Mainaig iti daytoy, inpakaammo ni Calapao a dimmalan a dagus ti rapid test dagiti kabbalay ti pasyente ket negatibo amin ti resulta da.
