LAOAG CITY – Inlawlawag ni Barangay Chairman George Ragunjan iti Barangay Caroan iti ili ti Pasuquin no anya ti pappapirmaan na kadagiti kabarangayan na a maipagarop a blangko a papel.
Segun kenni Ragunjan, adda ti mandato kenkuana manipud ti gobierno probinsyal partikular ti OBA nga agpapirma isuna kadagiti residente a mabalin a maipaayan ti livelihood ken para pay iti cash for work program.
Inpetteng na a ti papel ket maipan ti nagan ken ti abay na ket agpirma da ken dagitoy ti mapan iti probinsyal kapitol ngem awan ti naibaga a palawag iti daytoy.
Kunana nga iti palawag kenkuana ti OBA ket mapan dagitoy iti kapitolyo ken ditoy to a maibinsa-binsa kadakuada ti nasao a programa wenno ayuda a maited.
Inbatad na a sakbay a nagpapirma ket nailawlawag na pay laeng kadagiti residente no anya daytoy a banag.
Innayon na a kalpasan ti panagpirma dagiti kabarangayan na ket beripikaren met laeng dagiti kameng ti OBA ti listaan.
