LAOAG CITY – Naglikudan ni Barangay Chairman Anghel Ramil iti Barangay Corocor iti ili ti Bacarra nga adda ti bayad na ti 25 kilo a bagas a maited kadagiti kabarangayan na.
Sungbat na daytoy iti dimmanon ditoy Bombo Radyo a mabayadan ti bagas sakbay a maited kadagiti residente iti nasao a barangay.
Segun kenni Ramil, nangted ti barangay ti 25 kilo a bagas iti kada pamilya a saan a nakaawat ti Social Amelioration Program (SAP) ti Department of Social Welfare and Development.
Mainaig iti dayto, kuna ti kapitan nga adda ti 12 nga agrirriri a saan nga immawat ti SAP ngem naikkanen ti bagas.
Nupay kasta, kalpasan daytoy ket napan dagiti maseknan iti DSWD tapno agreklamo wenno agdamag no apay a saan da benipisyaryo ti SAP rason a nairaman da met laeng.
Gapo iti daytoy, inbaga ni Ramil nga inpasubli da ti 25 kilo a bagas nga inted da kadagiti maseknan tapno maited kadagiti saan pay a nabunungan a pamilya a saan met a naikkan ti amelioration.
