LAOAG CITY – Napatawan ti 60 nga aldaw a preventive suspension ni Barangay Chairman George Ragunjan iti Barangay Caruan iti ili ti Pasuquin.
Segun kenni Sang. Bayan Secretary Tom Tacata iti nasao nga ili, naipatungpal daytoy kalpasan nga inaprubaran ni Mayor Ferdinand Aguinaldo ti rekomendasyon ti konseho.
Inlawlawag na a daytoy ket gapo iti reklamo dagiti residente iti Barangay Caruan seknan iti maipagarop a panaglasbing ti kapitan iti Section 60 iti Republic Act No. 7160 ken Republic Act No. 6713 wenno ti “Code of Conduct and Ethical Standards for Public Officials and Employees.”
Gapo iti daytoy, nangiyuswat da ti namindua a preliminary investigation iti Sang. Bayan ken iti naudi nga hearing ket napagnunumuan a maisardeng daytoy gapo ta mangisubmitir laengen ti position paper nga isu ti nagibasaran da.
Kunana nga idi Hulyo 2 ket nairwar ti resulta ti panagbubutos para iti rekomendasyon ti pannakasuspenso ti kapitan no sadinno a 6-1 ti butos pabor iti preventive suspension ken ti naikabil a maysa a rason ket ti harrassment of witnesses.
Naamoan a kalpasan daytoy ket inpaima da iti Mayor ken idi kalman, Hulyo 8 ket naiteden ti order kenni Ragunjan para iti suspensyon na ken epektibo a dagus.
Inbatad na a namunganay ti pannakasuspenso ti kapitan gapo iti reklamo pakaseknan iti pebbles, ken idi pay laeng 2017 dagiti reklamo.
Mainaig iti daytoy, inlawlawag ni Tacata a ti pannakasuspenso ni Ragujan ket tapno saan a makaapektar iti imbestigasyon ken saan na unay a maimpluwensyaan dagiti tattao ken masalwadan dagiti dokumento.
