LAOAG CITY – Inadmitir ni Barangay Chairman Jessie Toledo iti Barangay Suyo ditoy ciudad ti Laoag a nangisayangkat da ti checkpoint tapno tiliwen da dagiti traffic violators a dumalyasat iti barangay da uray awan dagiti kameng ti pulisya.
Inlawlawag na nga adda ti naiyuswat a taripnong da amin a barangay ditoy ciudad a pakairamanan dagiti barangay kagawad no sadinno a napagsasaritaan da kadagiti kameng ti pulisya ti pannakaipasigurado ti linak, urnus ken talna iti masakupan da a barangay.
Kuna na a gagem ti panagcheckpoint da ket tapno malapdan ti panagraira ti illegal a droga ken maliklikan wenno mapawilan dagiti nariringgor a lugan iti disoras ti rabii.
Mamati a babaen iti daytoy ket maaksyunan ti problema dagiti kabarangayan na ken karbengan da kas opisyal ti barangay.
Inadmitir pay ni Toledo a nagisyu da ti ticket gapu ta adda ti nadeputized a dua a kagawad da.
Innayon na nga iti damo ket adda ti kadwa da a kameng ti pulisya ngem iti sumarunon nga aldaw ket is-isudan nga opisyal ti barangay.
Kabayatanna, naglikudan ni Police Lt. Col Joemar Labiano, ti chief of police ditoy ciudad ti Laoag nga adda ti mandar na kadagiti opisyal ti barangay nga isuda lattan ti mangiyuswat ti checkpoint iti masakupan da a barangay.
Inpetteng na nga inbilin na laeng kadagiti opisyal ti barangay a sumurot kadagiti iyuswat da a checkpoints iti masakupan da a barangay ngem saan a mabalin a mangiyuswat da ti checkpoint no awan ti presensya dagiti kameng ti pulisya.
Inyarig pay ni Labiano ti pannakaiyuswat ti drug buy-bust operation no sadinno a maayaban ti media tapno imatangan na ti operasyon ngem masapol a PNP ti mangiyimplementar iti daytoy.
