Kinumpirmaran ni Brgy. Chairman Glenn Filomena, iti Brgy. Pambaran iti ili ti Paoay nga adda ti kabarangayan da a simmangpet idi sabado manipod iti siudad ti Vigan, Ilocos Sur.
Daytoy ket kalpasan nga adda ti naipadanon iti Bombo Radyo Laoag a maipagarup a saan na nga inpadalan iti quarantine ti maseknan a simmangpet.
Inlawlawag ni Filomena a saan a naipan iti quarantine ti maseknan gapu ta maibilang nga authorized person outside residence (APOR) ken naikamang laeng iti siudad ti Vigan.
Inbatad na a nakikoordinar kenkuana ti APOR ken nakaipakita ti kumpleto a dokumento para iti panagsubli na iti nadakamat a barangay.
Innayun na a makalawas laeng a nagtalinaed ti nasao nga APOR iti siudad ti Vigan ken nagsubli gapu ta aglukaten ti pagtrabtrabahoan na ditoy siudad ti Laoag.
Inpetteng na a saanda a mabalin a pawilan ti maseknan gapu ta siguden nga agnanaed iti barangayda ken maysa nga APOR.
Kabayatanna, inlawlawag ni PCpt. Joseph Tayaban iti PNP Badoc nga awan ti kwestyun ti saan a pannakaipan iti quarantine ti residente iti ili ti Paoay a naggapo iti siudad ti Vigan, Ilocos Sur.
Kuna ni Tayaban nga adda ti pribiliheyo ti maseknan gapu ta maibilang kas APOR nga agsubi iti trabaho basar iti guidelines ti IATF.
Inbatad na a mandatory ti rapid testing iti border checkpoint iti ili ti Badoc ken negatibo ti resulta ti nasao a residente.
