LAOAG CITY – Dimmawat ti dispensar ni Brgy. Chairman Sonny Camangeg iti Brgy. Ricarte iti ciudad ti Batac iti inaramidda a panangdisinfect iti simmangpet a babai nga OFW a naggapo idiay Hong Kong.
Segun kenni Camangeg, idi madamag da a simmangpet ti maysa kadagiti kabaranggayan da a naggapo idiay Hong Kong ket saandan a napanunot a nasayaat no ania iti aramiden da.
Daytoy ket kalpasan nga arigna nga indigos dagiti opisyal ti barangay ti disinfectant iti nasao nga OFW.
Naamoan nga apaman a nakasangpet ti OFW idiay Manila ket naipan da iti maysa nga hotel ken nagpasukat-sukat da iti lugan ti OWWA.
Inpasingked na a saan da naikkan ti practice iti inaramidda a panangdisinfect da iti babai.
Innayon ti Brgy. Chairman nga inaramidda laeng ti pagrebbenganda ngem inadmitir na a nasobraan da daytoy.
