LAOAG CITY – Inlawlawag ni Brgy. Chairman Atong Garcia iti Brgy. Santiago iti ili ti Solsona a kayatna ti gagem ni Mr. Charles Curameng a mangiwaras iti school supplies kadagiti agad-adal iti Day Care Centers iti nadakamat nga ili ngem masapul a dumalan daytoy iti umno a proseso.
Daytoy ket kalpasan nga adda ti nairuar nga Municipal Memorandum Oder Number gel. 2004-112 idi laeng kalaman Agosto 13 manipud iti lokal a gobierno iti nadakamat nga ili.
Segun kenkuana, ti nadakamat a memorandum ket masapol nga agpermit iti ania man nga aktibidad wenno charities activities kas iti panaggipaay ti ayuda iti nadakamat nga ili.
Inbatadna a saanna a pinalubusan ni Brgy. Chairman Garcia ti grupo ni Curameng a manggibunong ti school supplies gapu ta kayatna daytoy a sumurot iti linteg.
Mainaig iti daytoy, nangrugi a nagibunong ti school supplies ti grupo ni Curameng idi Lunes iti Agosto 12.
Nupay kasta, kinuna ni Garcia a idi laeng Agosto 13 ti malem a nangipatulod ni Curameng ti mensahe kenkuana maipanggep iti panangipaay ti school supplies iti Day Care Center iti nadakamat a barangay.
Kinunana a saan nga daytoy ti immuna a gundaway nga adda dagiti mangipaay a tulong para kadagiti residente iti ili ti Solsona no sadinno nga adda ti pammalubos wenno permit manipud iti biang ti mayor iti nadakamat nga ili.
Innayonna a kita daytoy iti publicity act ti panagipaay ni Curameng iti school supplies kadagiti Day Care Centers.
Kabayatanna, ti kayat laeng ni kapitan Garcia a sumurot iti linteg ti gobierno ni Curameng.
