LAOAG CITY – Naglikudan ni Barangay Chairman Rolly Magbual iti Barangay Paltit iti ili ti Badoc mainaig iti alegasyon a tinutukan na ti paltog dagiti estudyante a mapan koma agay-ayam ti basketball iti basketball court ti barangay da.
Inlawlawag na a kabayatan ti panagibunong da ti bagas ket simmangpet ti grupo dagiti estudyante tapno agay-ayam ti basketball.
Nupay kasta, gapu ta saanda pay a nakaibunong ti bagas ket inbaon na ti maysa a barangay tanud da tapno kasarita dagiti estudyante a pumanaw paylaeng.
Kagiddan iti daytoy, inbilin pay ti kapitan iti barangay tanud a kasarita na dagiti estudyante a no mapan da agay-ayam iti basketball court ket siguradwen da nga awan ti mabati a basura da, a kas ti napaspasamak iti kallabes.
Inpasingked ni Magbual nga awan ti kinapudno na ti alegasyon gapu ta awan ti itugtugot ken ik-ikutan na a paltog.
Mainaig iti daytoy, inpakaammo ni Barangay Chairman Magbual nga immunan a naidanun daytoy a banag iti Philippine National Police isut gapuna nga addan ti panagturong da iti barangay da tapno irebisar ti naimuntar a Closed-circuit Television (CCTV) no sadinno a napaneknekan da nga awan ti napasamak a panagtutuk na ti paltog kadagiti estudyante.
Innayon na a nakasagana a mangidatag iti CCTV footage kadagiti saan a mamati kenkuana.
