LAOAG CITY – Sinungbatan ni Barangay Chairman Noly Gregorio iti Barangay Calambeg iti ili ti Piddig ti naidanun a reklamo ditoy Bombo Radyo Laoag maipanggep ti trabaho na kas maysa a kapitan ti barko kabayatan ti panangidaulo na iti barangay da.
Maibasar ti reklamo, maipagarop a saanen a maar-aramid ni Gregorio ti pagrebbengan na kas ama ti barangay gapu ta kanayun nga awan isut gapuna nga awan ti pagtarayan dagiti residente no adda ti kasapulan da.
Iti mensahe nga inpatulod ni Gregorio iti Bombo Radyo Laoag, inlawlawag na a sumakay ti barko ket agpila ti leave of absence no sadinno a saan nga agsweldo iti kaawan na iti barangay da, ken ti 1st kagawad da ti mangisuno paylaeng kenkuana.
Kuna na a tallo a bolan na iti barko ken tallo a bolan met ti bakasyon na, ken inpasigurado na a saan a maapektaran dagiti serbisyo a maipapaay kadagiti kabarangayan da.
Inrakurak na pay a damdamagen na iti kaadoan no kayatda nga agresign ngem saanda a palubusan isut gapuna nga itultuloy na latta ti agserbi kas ama ti barangay.
Inkalintegan na pay a saan nga ipawil ti linteg ti panagtrabaho na gapu ta saan a makaumanay ti aw-awaten na nga honorarium, ken iti propesyon na ket saanna a mabalin a tallikudan gapu ta kas ship captain ken agswelsweldo ti $13,700.00 wenno kaibatugan ti nasurok a 800 a ribo a pisos.
Innayon na a napateg kenkuana ti barangay da ken aramiden na amin a kabaelan na para iti pagsayaatan dagiti kalugaran na, ken adda pay ti sumagmamano nga scholars na no sadinno a dagiti dadduma ket nagturpos dan iti panagadal.
Malaksid iti daytoy, tunggal madanon ti paskua ket mangipapaay ti regalo kadagiti kabarangayan na no sadinno nga aggapo amin dagitoy iti bulsa na.
Mamati ni Gregorio a dagiti nagreklamo ket possible a dagiti mangayat nga agtugaw nga addaan ti bukod nga interest.
Kabayatanna, iti biang ti Department of the Interior and Local Government ket saan a maipawil ti panagtrabaho ti maysa nga opisyal ti barangay laketdi masigurado a saan a maapektaran ti trabaho ken responsibilidad na iti barangay da.
