LAOAG CITY – Napalalo ti ragsak ni Barangay Chairman Jojie Calapao iti Barangay Barani iti ciudad ti Batac gapu kadagiti nagun-od na a tallo a pammadayaw.
Karaman kadagiti nagun-od ni Calapao a pammadayaw ket ti International Service Award, Gawad Karangalan Filipino Dangal Lingkod Award, ken ti ACSH Humanitarian Member Public Service Humanitarian Advocate.
Segun ken ni Calapao, ti International Service Award ti kangatoan a pammadayaw a nagun-od na no sadinno nga addaan daytoy ti tie-up a 29 a pagilyan iti intero a lubong.
Inlawlawag na a ti criteria dagiti naawat na a pammadayaw ket innominar isuna ti Selection Committee no sadinno a pinagipasa da kadagiti aktibidad, programa ken dagiti naawat a pammadayaw ti Barangay Barani kalpasan na ket naiyuswat ti validation.
Inpalgak na a kalpasan iti naiyuswat a validation ket saanna a ninamnama nga isuna ti napagasatan a nangabak kadagiti tallo a pammadayaw.
Saan met a nalipatan ni Calapao dagiti kabarangayan na iti pannakagun-od na kadagiti nasao a pammadayaw gapu ta para kenkuana ket saanna a nagun-od dagitoy no awan ti tulong ken kooperasyon dagiti kalugaran na.
Ti kaunaan a World Council Excellence Award ket naiyuswat iti Fort Ilocandia Resort Hotel and Casino ditoy ciudad ti Laoag idi kalman, Hulyo 30 ita a tawen.
