LAOAG CITY – Patien ni Brgy. Chairman Mario Guillermo, Brgy. Lorenzo iti ili ti Banna nga awan ti pakainaigan ti covid-19 vaccine iti pannakatay ti maysa a kabarangayanna.
Kuna ni Guillermo a sakbay pay a nabakunaan ni Mr. Thomas Flores idi Mayo 19 ket addan dagiti marikrikna na
Inbatad na nga addan dagiti gundaway a naibagbaga kenkuana ni Flores nga adda ti sakit a sagsagabaen na.
Mainaig iti daytoy, inlawlawag ti kapitan a sakbay a nabakunaan ni Flores ket dimmalan iti screening.
Innayun na a kalpasan ti panagbakuna ket awan met dagiti naireport kenkuana mainaig ti adverse effect ti bakuna.
Immun-una ngem iti daytoy, inpakaammo ti kapitan a maipagarup a narigatan nga umanges ni Flores rason a naitaray iti Mariano Marcos Memorial Hospital iti siudad ti Batac ngem pimmusay idi parbangon ti Mayo 28.
Kabayatanna, inbunannag ni Flores a masapol a maadal a nasayaat nu adda ti pannakainaig ti bakuna iti pannakatay ti kabarangayanna.
