LAOAG CITY – Naglikudan ni Barangay Chairman Pete Duldulao iti Barangay 21, San Agustin, San Nicolas, Ilocos Norte ti reklamo a naidanun iti Bombo Radyo nga adda dagiti inikkat a barangay health worker (BHW) iti barangay da.
Inlawlawag na nga awan ti inikkat na no di nagnayun pay daytoy tapno ad-ado dagiti pagkamangan dagiti kabarangay da no kasapulan.
Kabayatanna, inpasingked ni Duldulao a saan a dagiti BHW ti agit—ited ti barangay clearance iti barangay da.
Inbatad na a kada aldaw ket adda ti napusgan a barangay kagawad nga agduty ken dagitoy ti agited ti clearance nga addan ti perma na.
Nupay kasta, naiget ti pammilin na kadagiti barangay kagawad nga arisiten na a naimbag dagiti ik-ikkan da ti clearance no dagitoy ket rebbeng na met laeng a maikkan.
