LAOAG CITY – Inlawlawag ni Barangay Chairman Jayson Ponce iti Barangay Araniw ditoy ciudad ti Laoag ti flood control project a mamagkonektar iti barangay da ken ti Barangay Cabungaan.
Inbatad na a ti nasao a proyekto ket narugyan laeng idi Pebrero ita a tawen.
Kuna na a 2023 idi nagkiddaw da ti pondo para iti nasao a proyekto ngem ita laeng a tawen a naaprubaran daytoy isut gapuna a masdaaw no apay a nairaman a naireport iti “sumbongansapangulo”.
Gapu iti daytoy, inbatad ni Ponce nga kasayaatan no iti laengen Department of Public Works and Highways – 1st Engineering District ti mapasaludsudan mainaig iti daytoy a banag gapu ta isu ti implementing agency.
Kabayatanna, inpadas ti Bombo Radyo Laoag News team nga alaen ti kabibiangan ti nasao nga opisina partikular ken ni Engr. Glenn Miguel ngem agpapan maisursurat daytoy a damag ket awan pay ti nagbalin a palawagna.
