LAOAG CITY – Linawlawagan ni Barangay Chairman Jeramie Ramos iti Barangay 18, San Isidro iti ili ti Sarrat ti alegasyon ni Mrs. Jemma Salapungol mainaig iti pannakaikkat ti nagan ti anak na iti listaan ti PBBM Scholarship grant.
Segun ken ni Kapitan Ramos, sakbay a nagpili da ti benepisyaryo para iti nasao a programa ket inimbitaran da dagiti 3rd year ken 4th year college karaman dagiti nagannak da iti Barangay da tapno mainterview ken ditoy a maestablisar no siasinno ti kwalipikado a maipaayan ti tulong pinansyal.
Kuna na nga idi damo a nangisayangkat da ti interview ket saan a napan ti anak ni Mrs. Salapungol isut gapuna nga isuna a mismon ti ininterview da no sadinno nga inpasingkedna nga adda ti nakairamanan idi ti anak na nga scholarship ngem nabayagen daytoy.
Gapu iti daytoy, maysa ti anak ni Salapungol kadagiti lima a pinili da mabalin a manggundaway iti PBBM Scholarship grant, ngem adda ti naawat da nga impormasyon a ti maseknan nga estudyante ket naawat na laeng idi Hulyo ita a tawen ti CHED Tertiary Education Subsidy (TES) na.
Inrakurak na a malaksid iti anak ni Salapungol ket adda pay ti dua nga inikkat da gapu ta ti maysa ket naduktalan da a naawat da met laeng ti scholar da iti nabiit idinto a ti maysa ket napanda nagnaed iti sabali a barangay.
Inpaganetget ti kapitan a ti pagannurutan ket masapol a dagiti mapili a benepisyaryo ti programa ket awan pay a pulos ti naawat da nga scholar, awan pay ti nagturpos iti kolehiyo iti pamilya da, masapol a residente a mismo iti barangayda ken agngangabit a saan a makaturpos gapu ta awan ti sabali a tumulong kadakuada, partikular iti pinansyal.
Inpetteng ni Ramos nga uray ti anak ti barangay kagawad na a maysa ket saanda nga innala gapu iti makunkuna a “for delikadeza”
Kabayatanna, inlawlawag pay ti kapitan ti kasasaad ti panagbiag dagiti dua a napili da para iti nasao a programa nga immunan nga inladawan ni Mrs. Salapungol nga adda met ti mabalin da iti panagbiag.
Kuna ni Ramos a ni Althea ket lima da nga agkakabsat ken isuna laeng ti agad-adal iti kolehiyo no sadinno a ti ama na laeng ti agtrabtrabaho para iti pamilya da.
Innayon na a no ti maipanggep met ken ni Joanna ket senior citizenen ti step-father na idinto a ti ina na ket awan iti stable a pagtrabahoan na.
Inbatad na a ti laeng pangnamnamaan ti nagannak ni Joanna ket ti maangkat da a mangga iti unos ti makatawen, a no napintas ti presyo ket isu laeng ti gundaway nga adda met ti maurnong da.
Inkalintegan pay ni Kapitan Ramos nga uray adda man ti kabagyan dagiti maseknan nga adda ti mabalin na ket saanda a maited amin ti kasapulan iti panagadal da, ken adda met dagiti kabagyan a nairot ti panagpuspuso na isut gapuna a narigat ti mangnamnama iti suporta dagitoy.
