LAOAG CITY – Inadmitir ni Barangay Chairman Richard Agpaoa, iti Barangay 11, Sta. Rosa iti ili ti Sarrat a maalarma iti panagpositibo ti kabarangayan da a ni IN-C48, agtawen ti 42.
Segun kenni Agpaoa, maipagarop a ti nakaalaan ni IN-C48 ket ni IN-41 a maysa met kadagiti direct contact ti pimmusay a ni IN-C36.
Kunana a ni IN-C48 ken IN-C41 ket agkatrabaho wenno maymaysa a kompanya ti pagpapaayan da.
Inbatad na a no adda ti gatangen wenno kasapulan dagiti pamilya iti Sitio 1, 2 ken 3 a nakaipatungpalan ti lockdown ket isuda nga opisyal ti barangay, dagiti tanod ken BHW ti mapan gumatang.
Kunana a mamindua iti makalawas laeng a mabalin nga agpagatang dagiti pamilya tapno saan met unay a rumwar iti barangay dagiti opisyales ken tanod.
Inpetteng na a kas basar iti pammilin, awan pulos ti mabalin a rumwar ken sumrek kadagiti nadakamat a sitio.
Inpasigurado na met a naiget a maipatpatungpal ti health protocols kasta met ti curfew ken 24 nga oras nga adda ti nakabantay kadagiti barikada.
Mangnamnama met nga awanen ti agpositibo iti virus a kaprobinsyaan.
