LAOAG CITY – Inlawlawag ni Barangay Chairman Ruben Roque iti Barangay Nalbo ditoy ciudad ti Laoag no kasano ti pannakaduktal da a natakaw ti birbiruken da a baka.
Segun kenni Roque, idi Nobyembre 7 ket nagbirbirok da agingga iti parbangon, ken adda pay ti gundaway a pinalukatan da ti nakita da a pakailugluganan dagiti taraken ngem awan ditoy ti baka a birburken da.
Inbatad na nga iti panagtultuloy ti panagbirok da ket nakita da ti baka iti paset ti Barangay 1 ket nakawarwar iti kataltalunan.
Kunana a ditoy a naamoan da a nailako iti maysa nga indibidwal ti baka iti balor nga 31 a ribo a pisos iti laksid nga awan ti dokumento ti nasao a dingwen.
Inpakammo na a basar kadagiti gimmatang ket saan da nga ammo a takaw ti ginatang da a baka ken saan da nga ammo ti nanggatangan da.
Inbaga na pay a basar iti palawag dagiti naglako iti gimmatang ket mangabarwanan da ti taraken isut gapo na nga ilako da ti baka.
Naamoan a ti baka a natakaw ken nailako ket masikog.
Kabayatanna, inadmitir ni Roque a dua a lawas ti napalabas ket adda manen ti baka a napukaw iti barangay da.
Immapela met daytoy kadagiti kabarangayan na nga agridam dagitoy ket agtitinnulong da.
