LAOAG CITY – Inlawlawag ni Barangay Chairman Roy Saducos iti Brgy. Pasil iti ili ti Paoay ti pakaipanan ti masingsingir a membership fee kadagiti mannalon a kabarangayanna.
Daytoy ket kalpasan nga adda ti nagreklamo a kabarangayanna a maipagarup a saan a naipalubos nga agusar iti harvester gapu ta saan a nagbayad ti membership fee.
Kuna ni Saducos a ti singsingiren a membership fee ti sanjera ket mausar kas diskwento kadagiti mangusar iti farm machineries nga adda iti barangay.
Inlawlawag ti kapitan a daytoy ket napagtutulagan dagiti miembro ti sanjera kangrunaan iti naited nga harvester iti barangay.
Mainaig iti daytoy, inpakaammo ni Saducos mabalin a buluden dagiti kabarangayanna ti harvester ngem saan laeng a maikkan ti diskwento dagiti saan a nagbayad ti membership fee.
Innayun na a nu maipanggep met iti pannakaawat dagiti nagbayad ti membership fee ti abono ken nagduduma pay nga agricultural aid manipod iti department of agriculture ket saan a kayat a sawen nga awan ti maawat dagiti saan a nakabayad.
Inpetteng na a babaen iti panagtataripnong na idi sabado, ket napagtutulagan a dagiti pay laeng nakabayad ti membership fee ti umuna a makaawat iti agricultural aid manipod iti Department of Agriculture.
Immunan nga inlawlawag ni Saducos a naadaw ti panagpabayad ti membership fee babaen kadagiti nasursuro da iti seminar ti National Irrigation Association.
Naamoan a 100 ti membership fee ken 100 pay ti annual dues a baybayadan dagiti mannalon iti gunglo da.
