LAOAG CITY – Agpakpakaasi ni Brgy. Chairman Ruben Ancheta ti Brgy. Barit ditoy siudad ti Laoag kadagiti agpanpanday linteg iti Sangguniang Panlungsod ditoy Siudad iti pannakatarimaan ti turn-out wenno pangawidan dagiti mannalon iti barangayda.
Daytoy ket kalpasan a kinumpirmaran mismo ti kapitan a naperdi ti pangawidan dagiti mannalon nga isu ti nangitunda ti saanen a nakaiyuswat pay dagitoy para iti second crop.
Segun kenkuana, dua a tawenen a daytoy ti maysa kadagiti pagparikutan dagiti mannalon a kabarangayanna no sadino ket namindua payen a daras a nagpatulongda iti National Irrigation Administration ngem awan pay ti nagbalin a solusyon iti problemada agpapan iti daytoy a gundaway.
Gapu iti daytoy, kunana a nagtitinnulong dagiti kameng ti sanjera tapno adda latta ti pangalaanda ti danom a mausar iti mula dagitoy iti kataltalonan ngem saan nga agbayag ket agperdi manen daytoy.
Inbatadna a gapu iti kinarigat ti situasion a mapaspasaran dagiti sangapulo a mannalon iti barangayda ket inpadanonna daytoy a banag kadagiti agpanpanday linteg iti Sangguniang Panlungsod ditoy Siudad nga idadauloan ni Bise Mayor Carlos Farinas kabayatan ti naisayangkat nga Outreach Program.
Inlawlawagna nga iti agdama ket agar-aramid ti temporario a wagas dagiti maseknan a mannalon tapno adda latta ti pagpadanumda iti mulada kas ti panagusar ti water pump.
Kunana nga idi napalpalabas a tawen ket umabot pay iti third crop ti panagmula dagiti mannalon ngem gapu iti panagkurkurang ti danom kadagitoy a gundaway ket marigatanda payen para iti second crop.
Mainaig iti daytoy, inpakaammona nga agsurat ti Sangguniang Panlungsod ditoy Siudad ti Laoag iti National Irrigation Administration ken Department of Public Works and Highways para iti pannakasolbar iti daytoy a banag.
Kabayatanna, naammoan nga iti kallabes ket umabot iti 12 nga ektarya ti kalawa ti mamulaan dagiti maseknan a mannalon.
