LAOAG CITY – Linawlawagan ni Barangay Kagawad Bryan Casabay iti Barangay 14 iti ili ti San Nicolas ti alegasyon kenkuana ni Barangay Chairman Florendo Corpuz mainaig iti 30 a nainayun a benepisyaryo ti Assistance to Individuals in Crisis Situation iti barangay da.
Inbatad ni Casabay nga adda ti timmawag kenkuana nga agpapaay iti Admin Office iti lokal a gobierno iti ili ti San Nicolas ken inbilin na a mangisumitir ti 30 a nagan ti kabarangayan na nga agbalin pay a benepisyaryo ti Assistance to Individuals in Crisis Situation a programa ti Department of Social Welfare and Development.
Segun ken ni Casabay, sinaludsud na iti timmawag no apay a saan a ni Corpuz ti tinawagan na ngem insungbat ti naud-udi a naikkanen ti slot ti kapitan.
Gapu iti daytoy, nagdardaras a napan nagbiruk kadagiti kabarangayan na a patien na a kwalipikado nga agbalin a benepisyaryo iti nasao a programa gapu ta limitado laeng ti oras a naipaay kenkuana.
Inkalintegan pay ti barangay kagawad a no maipapan iti panangkwes-kwestyunar ti kapitan a dagiti dadduma a naala a benepisyaryo ket saan a deserving.
Inpetteng na a ti rumbeng a pagdamagan ti kapitan ket dagiti mismo kameng ti Department of Social Welfare and Development gapu ta isuda ti nangaprubar kadagiti naala a benepisyaryo idinto a ti laeng inaramid na ket nagirekomendar.
Inpaganetget ni Casabay nga awan pulos ti maris pulitika na ti inaramid na gapu ta saanna a dinakdakamat ti maipapan iti mapaspasangasangan a Barangay ken Sang Kabataang Elections.
Maipalagip nga iti interview ti Bombo Radyo Laoag ken ni Barangay Chairman Corpuz ket inpalgak na a nadismaya ken maluksaw gapu ta saan pulos a naipakaammo kenkuana a manipud iti 10 laeng koma a benepisyaryo iti Assistance to Individuals in Crisis Situation iti barangay da ket nanayunan ti 30.
