LAOAG CITY – Inlawlawag ni Brgy. Kagawad Jaworse Salapungol iti Brgy. 18 iti ili a Sarrat ti sitwasyon ti nasao barangay kalpasan a nagbakasyon ni Brgy. Chairman Joey Ramos.
Inadmitir ni Salangupol a saan da a pulos a makatransaksyon iti bangko ken tallo bulanen a saan da a nakabayad ti kuryente ken BIR iti barangay.
Malaksid iti daytoy, kunana a saan pay a naited iti honorarium dagiti opisyal ti nasao a barangay.
Naamoan a nasurok dua a bulanen sipod idi nagbakasyon ni Ramos a nagturong idiay Espanya ken agngudo ti leave na intono Agosto 19.
Inbatad na nga in-email ni Ramos ti resignation na kas Brgy. Chairman iti nasao a barangay.
Gapu iti daytoy, urayen pay laeng ti 90 nga aldaw sakbay a mangaramid ti konseho ti resolusyon a mangideklara ti panangabandonar ni Ramos iti posisyon na kas Brgy. Chairman babaen ti local government code.
Kabayatanna, inbatad ti maysa a concerned citrizen a nasken a mangala ti opinyon iti DILG mainaig iti panangabandonar ni Brgy. Chairman Joey Ramos iti posisyon na ti Brgy. 18 iti ili a Sarrat.
Inlawlawag na a saan a mabalin a maapointaran iti uneg ti maysa a tawen ti maysa a nagtaray iti posisyon ti gobyerno a napabotosan ngem naabak.
Kuna na a nagtaray ni Brgy. Kagawad Jaworse Salapungol kas Sangguanian Bayan Member ken dati met laeng a Brgy. Chairman iti nasao a barangay.
Innayon na a rumbeng a kitaen dagiti opisyal ti barangay ti nasao nga isyu ken ipakaammo da iti Presidente ti Liga ti barangay tapno masolbar daytoy.
