LAOAG CITY – Kinumpirmaran ni PLt. Medel Perinion, ti hepe ti PNP-Currimao nga adda ti maysa a barangay kagawad iti Brgy. Lang-ayan iti nasao nga ili ti natiliw gapu iti maipagarup a pannaki-kamalala na.
Segun ken ni Perinion, mismo a ti ligal nga asawa ti kamalala ti barangay kagawad nga agtawen ti 56 ti timmakder kas complainant.
Immuna iti daytoy, inlawlawag ni hepe Perinion a a maipagarup nga inawis ti lalaki ti asawa na a mapan agluto ti tabako.
Nu pay kasta, nagkedked ti babai ken arigna saan na nga inkaso daytoy ken nagtalaw usar ti motorsiklo.
Gapu iti daytoy, sinurot ti lalaki ti asawa na usar ti bisikleta ket dita a nakadanun iti taltalon partikular iti kamaisan.
Dita metten a naduktalan na ti barangay kagawad ken ti asawa na a maipagarup nga agkanaig rason a nagbugkaw.
Kabayatanna, insegida a nagtaray metlaeng daytoy gapu ta nagamak iti barangay kagawad nu bilang adda ti bitbit na nga armas.
Nagreport a dagus ti lalaki iti PNP ken dita a naiyuswat ti hot pursuit operation nu sadino a balligi a natiliw ti barangay kagawad idinto nga agtultuloy ti pannakabirok ti babai.
Kabayatanna, kinumpirmaran met ni Brgy. Chairwoman Gemma Fernando iti Brgy. Lang-ayan nga agpayso ti nasao a report.
Nu pay kasta, kuna na nga awan ammo na iti relasyon ti barangay kagawad ken ti kamalala daytoy.
Iti agdama ket maisagsaganan ti maipila a kaso kontra iti barangay kagawad.
