LAOAG CITY – Maisagsaganan ti maipila a reklamo kontra ti maysa a barangay kagawad ti Brgy Susugaen iti ili a Pasuquin kalpasan a natiliw dagiti kameng ti PNP Laoag babaen ti drug buy bust operation a naiyuswat iti Brgy 10 ditoy siudad ti Laoag.
Nabigbig ti suspek a ni Barangay Kagawad Roger Failano y Broines, agtawen ti 40, naasawaan, maysa a tubero, drug surenderer ti PNP Pasuquin residente ti Brgy Susugaen iti nasao nga ili.
Segun ti PNP Laoag, ni Failano ket maibilang a level 1 ti High Value Target.
Nakumpiskar dagiti otoridad manipud ti suspek ti maysa a sachet a naglaon ti maipagarup a shabu ken maysa a big sachet a naglaon ti maipagarup a shabu, dua a 500 peso bill a marked money, personal a kuarta na nga umabot ti 280 a pisos, cellphone ken dadduma pay.
Nagtalinaed ni Failona iti kustudyar ti PNP Laoag para ti naan-anay a pannakaimbestigar na.
