LAOAG CITY – Ginandat ni Brgy. Kagawad Jessie Alnas ti Brgy. Lanao iti ili ti Bangui a tagbaten ti maysa a residente iti Brgy. Tarrag iti ili ti Pagudpud a ni Erwin Yacas a nakautang kenkuana.
Daytoy ket kalpasan a saan nga agbayad ti utang ni Yacas ken ni Brgy. Kagawad Alnas.
Gapu iti daytoy, kalikagum ni Brgy. Chairman Freddie Balbag, ti Brgy. Lanao iti ili ti Bangui a mapaayaban iti Barangay Hall dagiti dua a maseknan tapno mapagsasaritaan daytoy a naimbag.
Segun ken ni Kapitan Balbag, basar iti nakalapna nga impormasion ket nakautang ni Yacas ken ni Brgy. Kagawad Alnas ti 10 a ribu a pisos no sadino addan ti sumurok-kumurang tallo a tawenen ti napalabas.
Inlawlawagna a nakautang ni Yacas ken ni Brgy. Kagawad Alnas gapu iti panagsugalna iti maysa a minatayan iti sabali a barangay.
Inpalgakna a gapu iti naunday a panawen a saan pay a nakabayad ti utang ti nasao a residente ket nangitunda ti panagrubrub iti panagbinnara ken panagriri dagiti dua a maseknan.
Gapu iti daytoy, gagem ni Kapitan Balbag nga agsarita dagiti agsumbangir a partido tapno maiyurnos ken masolbar ti problema a nagbaetanda.
Kabayatanna, kinonderna ti inaramid ti Kagawadna iti nadakamat a residente nangruna ket maysa daytoy nga opisial ti barangay a masapol nga isu ti kangrunaan a pagwadan dagiti umili.
