LAOAG CITY – Inpetteng ni Brgy. Kapitan Jerry Alonzo, Brgy. 43 Cavit ditoy ciudad ti Laoag a naarisit a naimbag dagiti nailista a kwalipikado ti social amelioration program.
Daytoy ket kalpasan a dimmanon a surat ditoy Bombo Radyo ti maysa nga agrekreklamo seknan iti a husto a pannakaarisit dagiti nainayon a kwalipikado ti SAP.
Segun kenni Brgy. Kapitan Alonzo, naminlima a nasanitize dagiti listaan dagiti makaawat ti SAP.
Kunana a 73 dagiti kwalipikado ti SAP iti immuna a panang-validate ti CSWD iti listaan da ngem gapu ta kuna ti ahensya a maysa iti Brgy. Cavit iti kabassitan dagiti recipients ket nanayonan ti 11.
Inbatad na a dagiti nainayon a 11 ket dagiti agpenpension a makaaw-awat ti nababbaba ngem lima a ribo a pisos iti kada bulan idinto a nangnayon da manen ti 18 nga isu dagitoy dagiti naipatulod a listaan dagiti naipakamakam a recipients ti SAP.
Iti agdama, linukatan da para kadagiti bumaranggay dagiti mangayat nga agpavalidate iti CSWD.
Innayon ni Alonzo nga uray kayat da a mairaman amin a kabarangayan da ket awan ti maaramidan da gapo ta adda timasursurot a guidelines.
