LAOAG CITY – Inpasingked ni ABC President Joseph Ulit iti Brgy. Naguirangan iti siudad ti Batac a saan a mailockdown ti barangay da.
Daytoy ket kalpasan a naamuan ti Bombo Radyo Laoag nga agtrabtrabaho ti nagpositibo iti COVID-19 a taga Brgy. Magnuang, Batac City.
Inbatad ni Barangay Chairman Ulit a napaserraan ti pasdek a pagtrabtrabahuan ti COVID-19 positive.
Kuna na a no maserraan ti nasao a barangay ket saanen a makadalyasat dagiti tattao nga agturong ti Mariano Marcos Memorial Hospital and Medical Center.
Ti nasao a barangay ket kangrunaan a malabsan dagiti agdaldalyasat a naggapu iti ili ti Banna ken sumagmamano a barangay.
Kabayatanna, awan met ti sintomas ti COVID-19 dagiti pahinante ken driver a nakadkadua ti COVID-19 positive kalpasan a nagpacheck-up da iti nasao nga ospital.
Nupay kasta, naipadalan iti self quarantine dagiti kaubraan ti COVID-19 positive iti mismo a compound ti pagpapayaan da a pasdek negosyo.
Naamuan ti Bombo Radyo Laoag nga idi naiturpos ti nagpositibo a pahinante ti panaghome quarantine na iti kallabes ket awan dagiti sintomas a sinagaba na.
Nakarikna ti pasyente ti panagsakit ti buksit idi Biernes rason a naitaray iti ospital idi ta nangala ti ospital ti sample ken naduktalan laeng iti kalman a nagpositibo iti COVID-19.
Mapagat-atapan a naakaran ti maseknan a nagpositibo ti COVID-19 babaen ti panagdeliver na kadagiti makmakan iti Divisoria.
Saan met a makumpirmaran ni Ulit no agideldeliver dagiti maseknan ti prutas iti merkado publiko ditoy siudad ti Laoag.
