LAOAG CITY – Nakalockdown iti Brgy. Pugaoan iti ili Pinili iti laksid nga awan ti nagpositibo ti COVID-19 iti nadakamat a barangay.
Inlawlawag ni Brgy. Chairman Richell Quiddaoen a daytoy ket gapu ta napan nagatendar ni IN-C463 ti pasken iti nadakamat a barangay sakbay a naduktalan a positibo daytoy iti COVID-19.
Inbatadna a 17 dagiti nadeterminar a close contact ti pasyente iti nasao a barangay.
Naamoan nga nagpas-pasyar pay ni IN-C463 agsipod ta nabayag a saan a nakaap-apan iti barangayda ken napan na pinasyar dagiti kabagyanna iti Brgy. Pugaoan.
Kuna ti kapitan a kalpasan a naamoanda a positibo ni IN-C463 ket nagtataripnong dagiti opisyal iti Pinili para ti pannakailockdown ti Brgy. Pugaoan tapno maliklikan iti panagwaras ti virus.
Kadagitoy a gundaway ket awan pay ti naiparuk-at nga Executive Order manipod iti opisina ti Mayor.
Saan met pay a masigurado no kaano a malpas ti lockdown iti nasao a barangay ngem inpakaamo ti kapitan nga isagsaganan ti LGU Pinili ti maipaay nga ayuda kadagiti bumaranggay.
