LAOAG CITY – Kinumpirmaran ni Brgy. Chairman Marlon Batuon iti Brgy. Suba iti ili ti Paoay a saan a naipan iti lockdown ti barangay.
Daytoy ket iti laksid nga adda ti nagpositibo iti covid-19 nga isuna ni IN-C24, maysa a babai nga agtawen ti 24 ken returning resident manipod iti Parañaque.
Segun ken ni Batuon, saan a pulos napan iti barangayda ti pasyente gapu ta manipod idi simmangpet ditoy probinsya idi Hulyo 14 ket nagtalinaed iti quarantine facility agingga a naduktalan a positibo iti covid-19.
Inbatad na nga uray ti pamilya ti pasyente ket saan na a nakapulapol.
Nu pay kasta, inbaga ti kapitan a saan a maliklikan dagiti kabarangaynna ti ag-panic.
Innayun ni Batuon nga agtultuloy ti pannangballaag na kadagiti residente a suruten dagiti pagalagadan kontra iti covid-19 ken liklikan ti panangdiscriminate iti pamilya ti nagpositibo iti virus.
