LAOAG CITY – Inadmitir ni Brgy. Tanod Jonathan Asuncion, agtawen ti 28, awanan asawa ken residente ti Brgy. 41, Sitio 2, Balacad ditoy ciudad ti Laoag a dinangran na ni Bryan Cabaloan, agtawen ti 19 addaan ti Live in partner, maysa a construction worker ken residente met laeng iti nadakamat a barangay.
Inbatad na nga inanawa na laeng dagiti agririri a da Fernando Marcos ken Florencio Cabaloan gapu iti panangriribuk dagiti maseknan.
Inlawlawag ni Asuncion a nadanog na ni Bryan gapu ta imbes koma a tumulong met nga aganawa ket kinarit na pay isuna.
Inpalgak ti tanod a ti puon ti panagririri da Marcos ken Florencio ket ti saan a pinagkikinnaawatan ken ti nakaro nga impluwensiya ti arak.
Mainaig iti daytoy, inpakaammo ni Bryan a saan na nga ituloy a pilaan ti reklamo ni Asuncion no la ketdi suktan na ti sueldon a agingga a saan daytoy a makastrek ti pagtrabahoan kas construction worker.
Kunana a no nagpinnakawan dan ket saan na kuma a tarayan ti bayadan dagiti magastos na ti panagpaagas ti limmitem a mata na.
Naammoan a ni Florencio ket masansan a mangriribok no nakainom ti arak.
