LAOAG CITY – Inrakurak ni British Prime Minister Keir Starmer a naikeddeng ti panangbigbigda ti Palestinian state inton bulan ti Septiembre.
Daytoy ket no saan nga agsardeng ti Israel iti panangatake idiay Gaza.
Inbatad ni Starmer a maisayangkat ti nasao a pammigbig sakbay ti maiyuswat nga United Nations General Assembly.
Naammoan a dagiti sumagmamano nga indatag ni Starmer ket nasken nga agtungpalen ti Israel iti ceasefire ken awanen ti mapasamak a panangsakup daytoy iti West Bank.
Kunana a nagtalinaed ti kiddawda iti Hamas a nasken a mawaya-wayaanen dagiti hostages dagitoy.
Maipalagip a namin-adu a daras a nagpanawagan ti naruay a pagilian a nasken nga agsungbat ti Israel ken Hamas iti ceasefire gapu iti agtultuloy a panagadu dagiti matmatay.
