LAOAG CITY – Kinumpirmaran ti Bangko Sentral ng Pilipinas (BSP) nga awan ti rupa dagiti bannuar iti baro a ruar a disenio dagiti polymer banknotes.
Inlawlawag ni Bangko Sentral ng Pilipinas Banknotes and Securities Management Department Director Atty. Sarah Severina Curtis nga inikkatda ti rupa dagiti bannuar manipud kadagiti baro a P50, P100 ken P500 polymer banknotes ngem agtalinaed latta dagitoy kadagiti kuarta a papel nga adda iti sirkulasion daytoy.
Inbatad ni Curtis nga awan ti inikkatda a rupa kadagiti bannuar iti dati a kuarta a papel ken ti kaiparparuk-at a baro a disenio ti banknotes ket kanayonan laeng.
Kunana a kalikagumna a mai-feature met dagiti dadduma pay nga elemento ti Filipino identities gapu ta malaksid kadagiti bannuar ti pagilian ket mabigbigbig pay ti pagilian iti nabaknang a biodiversity daytoy.
Innayon ti opisial a ti panag-feature iti nasao nga endangered animals ket mangipangato pay ti kapanunotan tapno protektaran ti aglawlaw.
Iti baro a banknotes nga inruar idi Huebes, dagiti native, protected animals ken sabsabong pakairamanan dagiti traditional local weave designs ti naikabil.
Naammoan a karaman kadagiti ayup a naka-feature ket ti ugsa a nakita iti Visayas, ti Palawan peacock pheasant ken whale shark.
Kabayatanna, mairuar iti publiko dagiti baro a polymer banknotes inton Enero 2025.
