LAOAG CITY – Inbin-binsa ni Atty. Renee Mark Fajardo, Senior Investigation Group ti Bangko Sentral ng Pilipinas (BSP) dagiti mabalin a sangwen dagiti tattao a matiliwan nga agus-usar, agilaklako ken addaan ti peke a kwarta.
Segun kenni Fajardo, no ti maysa a tao ket nagimprenta ti peke a Philippine money ket mabalin a mabalod iti 12 a tawen ken maysa nga aldaw agingga iti 14 a tawen ken agmulta ti saan a nalablabes ngem dua a milyon a pisos.
No met ti indibidual ket napaneknekan a nagimprenta ti dolyar wenno dadduma pay a currencies ket mabalon iti walo agingga iti 10 a tawen ken agmulta ti maysa a milyon a pisos.
Inbatad na no natiliwan met nga addaan ti iggem a peke a kwarta ken ilaklako iti publiko ket mapanawan ti pannusa babaen iti Article 168 iti Revised Penal Code no sadinno mabalin iti 10 a tawen ken maysa nga aldaw agingga iti 12 a tawen ken agmulta met laeng ti saan a nababbaba ngem dua a milyon a pisos.
Inlawlawag na a no ado ti iggem ti maysa a tao a peke a kwarta ken maimbestigar no anya ti pudno nga intensyon ti maseknan.
Binalakadan pay ni Fajardo ti publiko a saan nga agilako ti play money ken no usaren daytoy para iti exhibiton ken educational purposes, masapol a mangala ti clearance iti Bangko Sentral ng Pilipinas ken makita ti dimension ti kwarta ken qualifications no pasok daytoy iti parameters ti central bank.
Mainaig iti daytoy, inulit manen ni Fajardo a peke nga impormasyon ti agwarwaras iti social media nga adda ti 150 peso banknote ken ginutigot na ti publiko nga iberipikar nangruna ket awan met ti inparuk-at ti Bangko Sentral ng Pilipinas a kastoy.
Kabayatanna, inbatad ni Fajardo a napateg ti kooperasyon ti publiko ken no adda ti maduktalan wenno maamoan nga adda ti iggem na a peke a kwarta ken agilaklako wenno agar-aramid ket ireport laeng iti Payment and Currencies Investigation Group iti Bangko Sentral ng Pilipinas wenno iti Philippine National Police ken iti National Bureau of Investigation.
