LAOAG CITY – Sipod idi nairubuat ti coin deposit machines (CoDMs) iti napalabas a tawen, nakaurnongen ti Bangko Sentral ng Pilipinas’ (BSP) ti P1 a bilyon a balor ti barya.
Basar iti Bangko Sentral ng Pilipinas, ti pakabuklan a bilang ti barya a naideposito kadagiti 24 a coin deposit machines ket dimmanon iti P1,008,889,490.24 manipud idi Hunio 2023 tapno maallukoy ti publiko nga usaren dagiti nakadulin a barya.
Ti 24 a coin deposit machines ket nakaiwaras kadagiti napili a mall ti Robinsons ken SM.
Iti babaen ti coin deposit machines, mabalin nga agdeposito ti asinoman iti machine ken ti pakabuklan a gatad a naitennag ket mai-credit iti e-wallet accounts-da iti GCash wenno Maya, GoTyme bank accounts wenno kadagiti shopping vouchers.
Plano ti Bangko Sentral ng Pilipinas a mangipasdekda pay ti kanayonan a 25 a coin deposit machines inton 2025.
