LAOAG CITY – Epektibo iti mental health ken anti-stress ti panagngalngal ti bubble gum.
Basar iti rimmuar nga impormasion, adda ti baro a gum ti candy brand a Mars a saan laeng a makatulong a mang-improve ti pokus no di ket adda pay ti ingredients daytoy a mangpasayaat iti salun-at ti utek.
Daytoy nga ideya ket naggapu iti maysa a nurse a nagbalin nga hobby-na ti panagngalngal ti bubble gum tapno makissayan ti stress iti shift-na idi kangitingitan ti pandemia.
Segun kadagiti sumagmamano a panagadal, makatulong iti mental health ti panagngalngal ti bubble gum.
Makakissay daytoy ti stress iti trabaho wenno iti panagadal.
Idi tawen 2018, nakita nga adda ti pakainaigan ti panagngalngal ti bubble gum iti panagngato ti learning performance.
Idi tawen 2015 met ket mangitunda daytoy ti nangatngato a productivity ken alertness.
Idi tawen 2009, rimmuar pay iti panagadal a makaapektar daytoy iti mood, anxiety ken stress level ti maysa a tao.
Nupay kasta, nagballaag ti Cleveland Clinic, mabalin a mangitunda ti health issues ti sobra a panagngalngal ti bubble gum.
Makapasakit iti panga ken temporomandibular joint (TMJ) nga agkonektar ti lower jaw iti skull.
Mabalin pay daytoy a makaapektar iti gastrointestinal system no sadino posible a maaddaan ti gas ken bloating wenno diarrhea.
Kabayatanna, naammoan nga adda dagiti tattao a ma-distract iti tagari ti panagngalngal ti bubble gum ti maysa a tao.
