LAOAG CITY – Kalpasan ti sumagmamano a daras a pannakaitantan ti budget deliberation iti konseho ditoy siudad para iti Laoag City General Hosiptal ket nairubwat daytoy ita aldaw.
Babaen iti panangidaulo ti Bise Mayor Vicentito Lazo iti nasao a deliberasyon, naamoan nga adda ti 196,000,050 ti maiyalokar a pondo para iti ospital.
Naamoan a daytoy ket partikular a maigatan iti x-ray a kaspaulan ti ospital tapno maipan iti level 2 manipod iti dati a level 1 wenno maysa pay laeng a clinic.
Mainaig iti daytoy, ti pondo ket mausar iti pannakatarimaan dagiti elevator, pannakaipalawa ti hallway ken paggatang kadagiti nayun nga equipments iti ospital.
Kabayatanna, saan a naliklikan kabayatan ti deliberasynon ti isyu seknan iti 100 a ribo a pisos a naigatang ti agas a saan met a naideliver wenno ti inwagan ni Lazo a “ghost medicine.”
Nu pay kasta, manamnama a maituloy ti budget deliberation ti LCGH intuno Huwebes, Enero 27.
