LAOAG CITY – Target ti Senate Committee on Finance a lippasen ti budget hearings inton Oktubre 24.
Inbatad ni Finance Committee Chairman Sherwin Gatchalian, adda ti schedule iti panangtalantan ti Finance committee ken subcommittees kadagiti budget iti tunggal ahensia.
Kunana a dagiti sumagmamano a nabatbati a government agencies a dumalan iti budget hearings inton sumaruno a lawas ket ti Department of Social Welfare and Development, Department of Energy, Department of Justice, Department of Environment and Natural Resources, Department of Labor and Employment, Department of Information and Communications Technology, Department of Agrarian Reform ken Office of the Ombudsman.
Inlawlawag ni Gatchalian a kalpasan ti panagdengngeg iti komite kadagiti pundo ti ahensia ket maiwayat ti technical working group meetings tapno mapagsasaritaan dagiti proposal dagiti senador ken no sadinno ti pangalaan ti pundo.
Ad-adalen ti Senado nga alaen ti pundo para kadagiti kasapulan a proyekto manipud kadagiti opisina wenno ahensia nga awanen iti mandato wenno sobra met ti pundona.
