LAOAG CITY – Maproblemaan ni Mr. Patrick Ratuita ti Budget Officer iti ili ti Pasuquin iti nabayag a pannakatratar ti Annual Budget iti Lokal a Gobierno iti nasao nga ili.
Segun kenkuana, saan kuma a mairamraman ti budget iti lokal a gobierno gapo ta dakkel ti agbalin nga epektona daytoy iti intero a munisipyo nangruna kadagiti residente.
Inlawlawagna nga iti kaleplepas a session ti Sangguniang Bayan ket ditoy a kinissayan da ti immuna nga inpropose ti Executive Branch a 233 Million pesos nga Annual Budget para iti tawen 2025, nakissayan daytoy iti 18 Million pesos ken napagbalin laengen a 215 Million pesos.
Kunana a ti pondo a nakissay ket manipud iti Development fund ti lokal a gobierno.
Inlawlawag pay ni Ratuita nga iti tunggal lokal a gobierno ket rumbeng nga adaan ti 20% development fund nga aggapu iti ipaay ti National Government a National Tax Allocation no sadinno a ti 20% ket maiyalokar kadagiti developmental project.
Mainaig iti daytoy, inrakurakna nga 11% laeng ti inaprobaran ti Sangguniang Bayan a development fund a mangipasimudaag a saan a nainkalintegan ken saan a maiyannatop iti nakailanad iti linteg.
Kabayatanna, inlawlawag met ti Local Chief Executive iti ili ti Pasuquin nga in-veto na laeng ti nasao a pondo ken apaman nga insubli na iti biang ti Sangguniang Bayan ket naka-attach ditoy ti veto message na.
Gapu iti daytoy, inpetteng ni Rituita a daytoy ket maibilang a re-enacted iti budget iti ili ti Pasuquin.
Mainiag iti daytoy, maipagarup nga kaaduan kadagiti Sangguniang Bayan Members ket kalikagum da a maaprobaran ti budget ngem rumrumwar a ti Bise Mayor, ABC President ken maysa a Konsehal ti saan nga umannamong iti daytoy.
