LAOAG CITY – Kinumpirmaran ni Mrs. Nelda Casas, ti OIC ti Budget Office iti lokal a gobierno ti Laoag a re-enacted ti budget ti ciudad iti tawen 2022.
Daytoy ket gapo ta saan pay nga inaprubaran ti Sang. Panlungsod ti 2022 Budget gapo iti nagduduma a kwestyun idi naidasar ti resolusyon ti pakainanan ti Project, Program and Activities manipud iti 70% ti Local Disaster Risk Reduction Management Fund.
Maipalagip nga idi natratar daytoy ket nadakamat ni Dr. Joseph Adaya a ti dua a milyon a pisos ket mausar a pagbayad iti utang kadagiti nausar kas iti lugan, hotels ken dadduma pay para iti pananglaban ti covid-19 nga isu ti nakwestyunaran nangruna ket awanen ti kaso ti covid ditoy ciudad ii dayta a gundaway.
Nupay kasta, itay laeng napan a lawas ket inlawlawag ni Casas a ti dua a milyon a pisos ket saan a pagbayad ti utang no diket mausar para iti pannakapapintas dagiti quarantine facilities ken pannakisagana kadagiti mausar
Mainaig iti daytoy, kuna pay ni Casas a ti laeng naimbitaran idi natratar daytoy ket ti Covid-19 Response Team.
Sungbat daytoy ni Casas iti rakurak ni Vice Mayor Vicentito Lazo a naimbitaran dagiti miembro ti Local Finance Committee.
Inpetteng pay ni Casas a natawagan da laeng idi manarimaanen ti panagsaludsod ti konseho kenni Dr. Adaya.
Inpalgak na pay nga awanen ti serbi na ti pannakaimbitar da iti daytoy a gundaway gapo ta ti dua a milyon a pisos ket naipanen iti trust fund.
Innayon ni Casas a ti dua a milyon a pisos ket mausar latta ngem masapol ti pannakaprubar manen ti sabali nga Appropriation Ordinance ken daytoy ket para laeng kadagiti nailanad iti Annual Investment Plan ti 2021.
