LAOAG CITY – Agkurkurang ti buffer stock ti bagas ken irik ti National Food Authority ditoy Ilocos Norte.
Daytoy ti kinumpirmaran ni Engr. Jonathan Corpuz, ti Branch Manager ti National Food Authority – Ilocos Norte.
Segun kenkuana, ti kangrunaan a rason no apay bumasbassit ti buffer stock ita ti nasao nga ahensia ket gapu ta nababbaba ti presio iti panaggatang ti National Food Authority ti irik kadagiti mannalon no idasig kadagiti traders.
Inbatadna a 23 a pisos iti kada kilo ti panaggatangda ti irik maidasig ti 28 a pisos iti kada kilo ti panaggatang ti irik dagiti traders kadagiti mannalon.
Gapu iti daytoy, kuna ni Engr. Corpuz a naiget ti panangikagumaanda nga aggatang ti irik kadagiti mannalon ditoy probinsia tapno umadu ti buffer stock-da.
Inlawlawagna a babaen iti Palay Procurement Program ket danonen dagiti kameng ti National Food Authority kadagiti mannalon a manarimaan ti panaggapasda tapno gatangen dagiti irik dagitoy.
Nagkiddaw ni Corpuz kadagiti maseknan a mannalon nga ilakoda iti ahensiada ti uray sag-lima a sako ti irik kadakuada tapno masupusupan ti nakabasbassit a buffer stock iti bodegada iti agdama.
Mainaig iti daytoy, kunana a dimmawatda ti pannakikoordinar iti National Irrigation Administration tapno kabayatan ti panagtataripnongda kadagiti nagduduma a sanjera ket ditoyda met ilawlawag ti programada pakaseknan iti panaggatangda ti irik.
Babaen iti daytoy, inpakaammona nga ad-adda a magutigot dagiti farmers organization a mangibingayda ti apitda nga ilakoda iti ahensiada.
Inpalgakna a ti target-da a gatangen idi napalabas a tawen ket 100 a ribu a sako ti irik ngem 1,840 a sako laeng ti nagatangda banag a kurang daytoy.
Innayonna nga iti agdama ket adda laeng 489 a sako ti bagas ken 1,853 a sako ti irik idinto nga adda pay ti nakapenpen a 2,550 a sako ti bagas manipod iti Office of Civil Defense iti bodegada.
